ბრისტოლი

ნიკო ნიკოლაძემ ფოთში მოღვაწეობისას, ქალაქის დაგეგმარებისა და არქიტექტურის განვითარებისათვის მოიწვია გერმანელ-ლიეტუვეელი ინჟინერი ედმუნდ ფრიკი, რომელმაც ფოთი მოდერნის სტილის შენობა-ნაგებობებით ევროპული ტიპის ქალაქად აქცია.

სწორედ ამ ნაგებობათა რიცხვს მიეკუთვნება ყოფილი სასტუმრო „ბრისტოლის" შენობა, რომელიც ფოთში ფრიკის დიზაინით 1906–1910 წლებში აიგო.

მე-19 — მე-20 საუკუნეების მიჯნაზე სასტუმროსათვის „ბრისტოლის" დარქმევა ერთგვარ მოდად იქცა. სასტუმროების მარკეტოლოგები ამ სახელწოდების წარმოშობის ორ ვერსიას ასახელებენ: ერთ-ერთი ვერსიით ის უკავშირდება ცნობილ ბრიტანელ ეპისკოპოსს, დიდგვაროვან ფრედერიკ აუგუსტ ჰარვი, რომელიც ბრისტოლის გრაფის ტიტულს ატარებდა.

გრაფი გამორჩეული სიმდიდრით, ხელოვნების სიყვარულით და განათლებით იყო ცნობილი, თუმცა ახასიათებდნენ, როგორც ექსცენტრიულ და კაპრიზულ ადამიანს. მოგზაურობისას მთელ თავის მოსამსახურე პერსონალს თან ატარებდა. ის ადგილები, სადაც გრაფი ჩერდებოდა, მაღალი სტანდარტებისა და კომფორტის შესაბამისი უნდა ყოფილიყო.

დღეს სასტუმრო „ბრისტოლის" შენობაში ამავე სახელწოდების რესტორანია განთავსებული. ნაგებობას ჩაუტარდა სარეაბილიტაციო სამუშაოები და მისი აუთენტიკობა დაცულია. ის საქართველოს კულტურული მემკვიდრეობის ძეგლია.

— არქიტექტორი ედმუნდ ფრიკი, 1906–1910 —